Nameyên Nûredîn Zaza

Dema mirov van nameyên Nûredîn Zaza (1919-1988) dixwîne, yên ku wî ji Hoşeng Sebrî û Hemreş Reşo re şandine, dibîne ku Nûredin Zaza wekî şahidekî serdema xwe çiqas giringî daye xebata di her warî de ya ji bo kurd û Kurdistanê û ziman û çanda kurdî. Bi rêya van nameyan em şahidîya jîyan û têkoşîna Nûredîn Zaza ya ji salên 60î heta salên 90î dikin. Ev nameyên bi hîs û wesîleyên cuda hatine nivîsîn di heman demê de kêşeyên rewşenbîrekî li sirgûnê û têkoşîna wî ya ji bo bîr û bawerîyên wî destnîşan dikin. Wextê ev nameyên ku cara ewil derketine meydanê bi nezereke derveyî vegêraneke lehengîyê bêne xwendin, dê baştir bê fahmkirin ka kesayetekî polîtîk û rewşenbîrekî kurd ê frankofon li hemberî pêdivîyên jîyanê yên rojane û têkoşîneke çawa nîşan daye û ketîye nav têkilîyên bi çi rengî. Pirtûk ji alî Mahmûd Lewendî û Nedîm Baran hatîye amadekirin û 273 rûpel e, ji sê beşan pêk tê, 1-Nameyên Ji bo Hoşeng Sebrî, 2- Nameyên ji bo Hemreş Reşo, 3- Album û endeks. Herweha Hoşeng Sebrî, Kemal Cemal Seydo û Samî Namî li ser Nuredîn Zaza û jiyana wî bîr û bawerî û bîranînên xwe nivisîne. Ev pirtûk ji bo kesên ku bixwazin alîyekî din yê jiyana Nûredîn Zaza nas bikin, berhemeke sûdmend û bikêrhatî ye.